सर्लाही,१ मंसिर । महोत्तरीमा प्रतिबन्धित लागु औषध सहित सर्लाहीका दुई युवक पक्राउ परेका छन । पक्राउ पर्नेहरूमा सर्लाही लालबन्दी नगरपालिका–११ बस्ने २७ वर्षीय आकाश ठाकुर र हरिवन नगरपालिका–२ बस्ने ३० वर्षीय पेमा दोर्जे लामा रहेका छन् ।
औरही नगरपालिका–१ औरही चेक पोष्ट अगाडि सडकबाट अवैध लागुऔषध गाँजा करिब १ सय ५० किलोग्राम, नगद ७७ हजार रुपैयाँ र मोबाइल ३ थान सहित उनिहरुलाई शनिबार दिउँसो प्रहरीले पक्राउ गरेको छ ।
जिल्ला प्रहरी कार्यालय महोत्तरी र प्रहरी चौकी औरहीबाट खटिएको प्रहरीले गौशलाबाट औरहीतर्फ आउँदै गरेको युपि ५७ एएफ ९४९५ नम्बरको कारलाई जाँच गर्ने क्रममा कारको डिकीमा ३० वटा पोकामा रहेको उक्त परिमाणको गाँजा फेला पारी चालक आकाश र कारमा सवार पेमा दोर्जेलाई पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।
