रौतहट, २ फागुन । रौतहटको मौलापुर नगरपालिकाको पतौराधाम स्थित धार्मिक, सांस्कृतिक, पर्यटकीय एवं ऐतिहासिक पुरातात्विक महादेव मन्दिरमा मधानी महायज्ञ आजदेखी सुरु भएको छ । भगवान शिवपार्वतीको बिवाह उत्सवको रुपमा मनाइने मधानी महायज्ञ तीनदिनसम्म विभिन्न कार्यक्रम सहित चल्नेछ ।
मौलापुर नगरपालिकाको आयोजना भइरहेको मधानी महायज्ञको आज शिवपार्वतीको बरात यात्रा निष्केको छ । नेपालमै प्रत्येक बर्ष पतौराधाममा भगवान शिवको बरात यात्रा निष्केको हो ।
बरात यात्रामा आम जनता पार्टी (आजपा)का अध्यक्ष एवं पूर्वमन्त्री प्रभु साह, मौलापुर नगरपालिकाका मेयर रिना साह सहित नेपाल र भारतका हजारौं भक्तजनको सहभागिता रहेको थियो । बसहामा शिव सवार रहेको सो बरात यात्रामा भगवान ब्रह्मा, बिष्णुसंगै ५६ कोटदेवता सहित बोलवम कवरियाका साथै स्थानीयहरु सहभागि रहेका थिए ।
मौलापुर नगरपालिका पतौराधाम स्थित धार्मिक, सांस्कृतिक, पर्यटकीय एवं ऐतिहासिक पुरातात्विक महादेव मन्दिरलाई विश्वसम्पदा सूचीमा सूचिकृत गराउने संकल्प सहित सुरु भएको मधानी महायज्ञ तीन दिनसम्म चल्ने मौलापुर नगरपालिकाका मेयर रिना साहले जनाएकी छन् ।
‘मधानी महायज्ञको आज पहिलो दिन हो । यहाँ विशेष पुजा हुन्छ । नेपाल सहित विश्वमा भगवान शिवको बरात यात्रा यहाँ पहिलो होला । मधानी महायज्ञमा नेपाल सहित भारतका दर्शनार्थीहरुको भिड लाग्ने गर्छ । यसले दुबै देशको सम्बन्ध अझै बलियो बनाउँने विश्वास छ । मधानी महायज्ञ नेपाल–भारत सम्बन्धको सेतु बनेको छ’, मौलापुर नगरपालिकाका मेयर साहले भनिन् ।
प्रत्येक बर्ष भगवान शिव पार्वतीकोको विवाह उत्सवको रुपमा मनाईने मधानी महायज्ञले धर्म, संस्कृतिको संरक्षण समेत हुने गरेको मेयर साहले जनाएकी छन् । नेपाल र भारतका लाखौं दर्शनार्थीहरु दर्शन गर्न यहाँ आउँने भएकाले त्यसले दुई देशको सम्बन्ध अझै बलियो बनाउँने विश्वास उनले व्यक्त गरिन् ।
सो अवसरमा बिभिन्न शिवमण्डलीका बीच नै कडा प्रतिस्पर्धा समेत हुने कार्यक्रम छ । मधानी महोत्सव हेर्नेको भिड लागेको छ । नेपाल र भारतका दर्शनार्थीहरु पतौराधाममा मधानी महायज्ञ हेर्न आएका छन् । हाती, घोडा सहित भक्तजनहरु बरात यात्रामा सहभागि भए ।
मौलापुर स्थित पतौरा महादेव मन्दिरलाई विश्व सम्पदा सूचिमा सुचिकृत गराउँने संकल्प सहित मधानी महायज्ञ हुदै आएको छ । सो अवसरमा भगवान शिव पार्वतीको बिवाहको सबै विधि प्रक्रिया हुनुका साथै अन्य खेलकुद, सांस्कृतिक कार्यक्रम समेत हुने गरेको छ ।
बर्षौ पहिला शिवको मुर्ति फेला परेको थियो । त्यसपछि पुरातत्व विभागले उत्खनन गरेको थियो । उत्खनन गर्दै गर्दा त्यहाँ ऐतिहासिक रुपमा महत्वपुर्ण मन्दिर लगायतका बस्तुको फेला परेको थियो । त्यसपछि लगाातार उत्खनन हुदै गएपछि गुप्तकालिन बस्तुहरु फेला परेकाले पालिका त्यसको संरक्षण गर्न तर्फ लागेको छ । हजारौं बर्ष पुराना मन्दिर सहित बिभिन्न बस्तु फेला परेपछि त्यसलाई विश्वसम्पदा सूचिमा सूचिकृत गर्नुपर्ने माग उठदै आएको छ ।
मधानी महायज्ञमा नेपाल र भारतका लाखौं सर्वसधारणको सहभागिता हुने र त्यसका लागि आवश्यक शान्ति सुरक्षा लगायतको तयारी सुरक्षा निकायले पुरा भएको जनाएको छ ।
