श्रमदान गर्ने अभियान अन्तर्गत मन्दिर सफाईमा जुटे नगर प्रमुख बुढाथोकी

सर्लाही,१८ भदौ ।सार्वजनिक स्थानमा श्रमदान गर्ने अभियान अन्तर्गत सर्लाहीको हरिवन नगरपालिकाका मेयर कमल बुढाथोकीले आज हरिवन ४ स्थित ऐतिहासिक गणेश मन्दिरको सरसफाई गरी श्रमदान गर्नुभएको छ ।
गएको शनिवार सोही वडाको सासापुर स्वास्थ्य चौकी परिसरको सरसफाई गरी श्रमदान गर्नुभएका मेयर बुढाथोकीले आज पटौनास्थित ऐतिहासिक गणेश मन्दिर परिसरको सरसफाई गर्नुभएको हो । यो सँगै अभियान सुरु भएको सातौं हप्ता भएको छ ।
मन्दिर परिसरको सरफाई कार्यक्रम पछि बोल्नुहुँदै मेयर बुढाथोकीले विकासका काममा जनतालाई अपनत्व होस् भन्ने सोचेर आफूहरुले सार्वजनिक स्थानमा श्रमदान गर्ने अभियान सुरु गरेको बताउनुभयो । उहाँले सार्वजनिक स्थानमा गरिने श्रमदानले राम्रो सन्देश दिने र श्रमदान गर्न सर्वसाधारणलाई समेत प्रेरित गर्ने बताउनुभयो । उहाँले घरअगाडिको ग्राभेल ल्याएर आफ्नो आँगनमा हाल्ने र बाटो राम्रो भएन भनेर नेतालाई गाली गर्ने प्रवृति मौलाउँदै गएको बताउनुभयो । उहाँले घर अगाडि फोहोर फालेर नगरपालिकाले सफा गरेन भन्ने परिपाटी तोड्न समेत सार्वजनिक स्थानमा श्रमदान अभियानले सहयोग गर्ने बताउनुभयो । उहाँले गणेश मन्दिर र पटौनाको विकासका लागि नगरपालिकाले विभिन्न योजनाहरु बनाएर काम गर्ने बताउनुभयो ।
त्यस्तै हरिवन ४ का वडाअध्यक्ष केशवराज थापा(बाबु)ले गणेश मन्दिरलाई धार्मिक तथा पर्यटकीय क्षेत्रको रुपमा विकास गर्न एक वर्ष निःस्वार्थ उत्साहजनक जनश्रमदानमा जुटीदिन वडावासीलाई आग्रह गर्नुभयो ।
मन्दिर परिसरको सरसफाईमा मेयर बुढाथोकी, वडा अध्यक्ष थापासहित हाम्रो कृषि सहकारी संस्थाका अध्यक्ष तिलक बहादुर खड्का, नगरपालिकाका अन्य जनप्रतिनिधि, कर्मचारी, सुरक्षाकर्मी र स्थानीयवासीको उल्लेख्य सहभागिता रहेको थियो ।