सर्लाहीमा स्रोत नखुलेको १५ लाख रुपैयाँसहित दुई जना पक्राउ

सर्लाही,२६ भदौ । सर्लाहीबाट स्रोत नखुलेको १५ लाखभन्दा बढी रकमसहित दुईजना पक्राउ परेका छन्।पक्राउ पर्नेमा बाँकेको कोहलपुर नगरपालिका ६ घर भई हाल काठमाडाँ चन्दागिरी नगरपालिका– १२ मा बस्ने ३५ वर्षीय जनकराज हमाल र धादिङको गल्छी गाउँपालिका ५ घर भई काठमाण्डौ १४ मा बस्ने २५ वर्षीय सुमन खतिवडा रहेको जिल्ला प्रहरी कार्यालय सर्लाहीले जनाएको छ।

सशस्त्र प्रहरी बल र भारतबाट खटेको एसएसबी सहितको टोलीले मलंगवा नगरपालिका ८ स्थित नेपाल भारत सिमाना एरियामा आवत जावत गर्ने सवारी साधन तथा मानिसहरुलाई रोकी चेकजाँच गर्ने क्रममा दुबैजनालाई पक्राउ गरिएको प्रहरी प्रवक्ता प्रहरी नायव उपरीक्षक बिजय यादवले जानकारी दिए।नेपालबाट भारत तर्फ बा ९८ प ७१५८ नम्बरको मोटरसाईकलमा दुबैजना सवार भइ गइरहेकोमा उनीहरुको शरीर तथा झोला तलासी गर्दा श्रोत खुल्न नसकेको झोलाबाट १५ लाख नेपाली रुपैयाँ र ,साथबाट १६ हजार बरामद भएको प्रवक्ता यादवले बताए।यस सम्बन्धमा थप अनुसन्धान भइरहेको जिल्ला प्रहरी कार्यालय सर्लाहीले जनाएको छ।