सर्लाही, ३ भदौ। सर्लाहीको चन्द्रनगर गाउँपालिकामा संविधान दिवस २०८१ विशेष कार्यक्रमसहित उल्लासपूर्वक मनाइएको छ। गाउँपालिकाले आयोजना गरेको कार्यक्रममा जनप्रतिनिधि तथा कर्मचारीहरूको उपस्थितिमा सामुदायिक स्थानहरूको सरसफाइ गर्दै संविधान दिवस मनाइको छ
।
संविधान दिवसको अवसरमा चन्द्रनगर गाउँपालिकाको अगाडिको सडक, नाढिमन ताल क्षेत्र र शिव मन्दिरको आसपास सरसफाइ गरिएको थियो।
सरसफाइ कार्यक्रममा प्रमुख सहभागिता जनाउनेहरूमध्ये गाउँपालिका अध्यक्ष राजकुमार महतो, उपाध्यक्ष गितादेवी महतो, प्रमुख प्रशासकीय अधिकृत वकिल प्रसाद पाल, वडा नं १ देखि ७ वटै वडाका अन्य जनप्रतिनिधि र कर्मचारीहरूको उपस्थिति उल्लेखनीय थियो।
गाउँपालिका अध्यक्ष राजकुमार महतोले संविधान दिवसको अवसरमा बोल्दै नेपालको संविधानले देशको कानूनी संरचना, जनताको अधिकार र कर्तव्यलाई परिभाषित गरेको उल्लेख गरे। उनले संविधान दिवसजस्तो महत्त्वपूर्ण दिनलाई सम्झनका लागि सामुदायिक गतिविधिहरू, विशेष गरी सरसफाइ अभियान, निकै सान्दर्भिक भएको बताए। अध्यक्ष महतोका अनुसार यस्ता कार्यक्रमहरूले स्थानीय जनताबीच एकता, जागरूकता र जिम्मेवारीको भावना विकास गर्न महत्वपूर्ण भूमिका खेल्छन्।
उपाध्यक्ष गितादेवी महतोले संविधानले सबै नेपाली नागरिकलाई समानता, स्वतन्त्रता, र न्यायको अधिकार सुनिश्चित गरेको बताउँदै संविधान दिवसको महत्वलाई जनसमक्ष फैलाउन आवश्यक रहेको धारणा राखिन्। उनले यस किसिमका सरसफाइ अभियानहरूले न केवल गाउँलाई सफा राख्न सहयोग गर्छन्, बरु जनचेतना अभिवृद्धि गर्ने र स्वस्थ समाज निर्माणमा पनि टेवा पुर्याउँछन् भन्नेमा जोड दिइन्।
प्रमुख प्रशासकीय अधिकृत वकिल प्रसाद पालले पनि कार्यक्रममा आफ्नो विचार व्यक्त गर्दै गाउँपालिकाले संविधान दिवसलाई सम्झनका लागि गरेको यो सरसफाइ अभियान अत्यन्तै सराहनीय रहेको बताए। उनले गाउँपालिकाले आगामी दिनमा पनि यस्ता अभियानहरूलाई निरन्तरता दिने प्रतिबद्धता व्यक्त गरे।
सरसफाइ कार्यक्रमका क्रममा जनप्रतिनिधिहरूले नाढिमन ताल र शिव मन्दिर क्षेत्रको विशेष सफाइ गरे। यसले त्यहाँको सौन्दर्य बढाउनुका साथै धार्मिक र पर्यटनस्थलको संरक्षणमा पनि महत्त्वपूर्ण भूमिका खेल्ने विश्वास गरिएको छ।
संविधान दिवसको अवसरमा गरिएको यस सरसफाइ अभियानले गाउँपालिकाका जनप्रतिनिधि तथा कर्मचारीहरूबीच एकताको सन्देश फैलाएको मात्र होइन, यसले समुदायलाई सफाइको महत्त्वबारे पनि चेतना फैलाएको छ।
