प्रदीप कुमार दास, रौतहट ।
पौष २१ गते, आईतवार ।
रौतहट जिल्लाको गरुडा नगरपालिकामा रहेको अनुष पार्टी प्यालेसमा नेपाल संघीय समाजवादी पार्टीको जिल्ला भेला तथा पार्टी प्रवेश कार्यक्रम भव्यताका साथ सम्पन्न भएको छ। कार्यक्रममा पार्टीको संगठनात्मक संरचना विस्तार र आगामी कार्यदिशाबारे गहन छलफल गरिएको थियो।
जिल्ला भेला अन्तर्गत, रौतहट जिल्लाका १ देखि ४ निर्वाचन क्षेत्रका क्षेत्रीय अध्यक्षहरूको चयन गरी निकट भविष्यमा क्षेत्रीय भेला गर्ने निर्णय गरिएको छ। क्षेत्रीय भेलापछि जिल्ला स्तरीय भेला आयोजनाको योजना बनाइएको छ। यसले पार्टीको संगठनलाई थप बलियो बनाउँदै जिल्ला स्तरमा एकीकृत रूपमा अगाडि बढ्ने मार्ग प्रशस्त गर्ने विश्वास गरिएको छ।
कार्यक्रममा नेपाल संघीय समाजवादी पार्टीका रौतहट जिल्ला अध्यक्ष अनिशुर रहमानसहित सम्पूर्ण जिल्ला पदाधिकारीहरूको उत्साहजनक उपस्थिति रहेको थियो। प्रमुख अतिथिका रूपमा पार्टीका केन्द्रीय अध्यक्ष एवं पूर्व संघीय गृह राज्य मन्त्री रिजवान अन्सारीको उपस्थितिले कार्यक्रमलाई विशेष महत्व प्रदान गरेको थियो। त्यसैगरी, मधेश प्रदेशका पूर्व गृह, सञ्चार तथा कानुन मन्त्री विमला अन्सारी, जिल्ला इन्चार्ज लक्ष्मी प्रसाद साह, मौलाना अनीसुर रहमान र अन्य थुप्रै नेता तथा कार्यकर्ताहरूको उल्लेखनीय सहभागिता रहेको थियो।
कार्यक्रममा स्थानीय पत्रकारहरूको पनि उल्लेखनीय उपस्थिति थियो, जसले कार्यक्रमका गतिविधिलाई व्यापक रूपमा प्रचार-प्रसार गर्न मद्दत पुर्यायो। कार्यक्रममा उपस्थित प्रमुख नेताहरूले संगठनात्मक एकताका लागि सक्रिय रूपमा योगदान गर्न कार्यकर्ताहरूलाई प्रेरित गरेका थिए।
पार्टीका केन्द्रीय अध्यक्ष रिजवान अन्सारीले कार्यक्रममा सम्बोधन गर्दै संघीय समाजवादी पार्टीले मुलुकको सामाजिक, आर्थिक र राजनीतिक विकासका लागि महत्वपूर्ण भूमिका खेल्ने प्रतिवद्धता व्यक्त गरे। उनले पार्टीले मधेशी समुदायका मुद्दाहरू मात्र नभई सम्पूर्ण नेपाली जनताको हितमा काम गर्ने बताएका थिए।
यस कार्यक्रमले रौतहट जिल्लामा पार्टीको लोकप्रियता र संगठनात्मक सुदृढीकरणका लागि सकारात्मक प्रभाव पार्ने अपेक्षा गरिएको छ। क्षेत्रीय र जिल्ला भेलाका निर्णयहरूले पार्टीलाई नयाँ ऊर्जा प्रदान गर्ने विश्वास नेताहरूले व्यक्त गरेका छन्।
