पत्रकार रजकको हत्याको विरोध गर्दै सर्लाहीमा प्रदर्शन
राजावादी आन्दोलनका क्रममा पत्रकार सुरेश रजकको हत्या भएको विरोधमा नेपाल पत्रकार महासंघ सर्लाही शाखाले आज शनिबार जिल्लाको सदरमुकाम मलंगवामा विरोध प्रदर्शन गरेको छ।नेपाल पत्रकार महासंघको आयोजनामा मलंगवा–१० स्थित जिल्ला प्रशासन कार्यालयको गेट अगाडिबाट जुलुस निकालिएको थियो।
प्रदर्शनमा सहभागीहरूले “पत्रकार रजकको हत्यारालाई कार्यवाही गर”, “घटनाको छानबिन गर”, “पत्रकार माथिको हमला बन्द गर” लगायतका नारा लगाउँदै नगरका विभिन्न भागको परिक्रमा गर्दै पुनः जिप्रकाको गेट अगाडि पुगेर कोण सभामा परिणत भएको थियो।
कोण सभामा बोल्दै नेपाल पत्रकार महासंघ सर्लाही शाखाका पूर्व अध्यक्ष शंकर श्रेष्ठ, वर्तमान जिल्ला अध्यक्ष ओमप्रकाश ठाकुर र नागरिक समाजका महासचिव शिवचन्द्र चौधरीले सुरेश रजकको हत्यारालाई तत्काल पक्राउ गरी कडा कानूनी कारबाही गर्न माग गरेका छन्।एभिन्युज टेलिभिजनका पत्रकार सुरेश रजक शुक्रबार काठमाडौँको तीनकुनेस्थित एक भवनबाट राजावादी आन्दोलनको भिडियो खिचिरहेका थिए।
सोही भवनभित्र उनको जलेको अवस्थामा शव फेला परेको थियो।उक्त घटनाले पत्रकारको सुरक्षा र अभिव्यक्ति स्वतन्त्रताको सवाललाई गम्भीर बनाएको भन्दै पत्रकार महासंघलगायत विभिन्न संघसंस्थाले घटनाको छानबिन गरी दोषीलाई कठोर सजाय दिन सरकारसँग माग गरेका छन्।
नेपाल पत्रकार महासंघ सर्लाही शाखाले पत्रकार रजकको हत्या जघन्य अपराध भएको भन्दै दोषीलाई कानूनी कठघरामा ल्याउन दबाब सिर्जना गर्न थप आन्दोलन गर्ने चेतावनी दिएको छ।
