सर्लाही, — जिल्ला सुरक्षा समिति सर्लाहीका अध्यक्ष एवम् प्रमुख जिल्ला अधिकारी श्री रामु राज कडरीयाको अध्यक्षतामा आज जिल्लास्थित उद्योग वाणिज्य संघका पदाधिकारी, उद्योगी तथा व्यवसायीहरूको सहभागितामा एक अन्तरक्रिया कार्यक्रम सम्पन्न गरिएको छ ।
उद्योग तथा व्यवसायको विकासका क्रममा देखा परेका समस्या, शान्ति–सुरक्षा, व्यापार सहजीकरण र समाधानका उपायहरू विषयक छलफलमा सहभागीहरूले आ–आफ्ना धारणा राखेका थिए । कार्यक्रममा उद्योगी व्यवसायीहरूले व्यापारमा देखिएका विभिन्न प्रशासनिक, सुरक्षा र संरचनागत समस्या उजागर गर्दै तिनीहरूको दीर्घकालीन समाधानका लागि पहल गर्न आग्रह गरेका थिए ।
प्रमुख जिल्ला अधिकारी कडरीयाले उद्योगी तथा व्यवसायीहरूका समस्या गम्भीर रूपमा लिइने बताउँदै स्थानीय स्तरमै समाधान गर्न सकिने समस्याहरू तत्काल समाधान गर्ने र माथिल्लो निकायको समन्वय आवश्यक पर्ने विषयहरू सम्बन्धित निकायमा पत्राचार गरी पठाइने जानकारी दिए ।
अन्तरक्रिया कार्यक्रममा सहभागीहरूले सर्लाहीमा उद्योग र व्यापारका लागि सहज वातावरण निर्माण गर्न जिल्ला सुरक्षा संयन्त्र, सरकारी कार्यालय, उद्योग वाणिज्य संघ र अन्य सरोकारवाला निकायबीच निरन्तर समन्वय र सहकार्य गर्नुपर्ने निष्कर्ष निकालेका छन् ।
