गौर नगरपालिकाद्वारा अल्ट्रासाउन्ड तथा थर्मोकोअगुलेटर मशीन हस्तान्तरण
प्रदीप दास, रौतहट
चैत्र १२ गते, मंगलबार
रौतहट जिल्लाको गौर नगरपालिकाले महिलाहरूको स्वास्थ्य परीक्षणलाई प्रभावकारी बनाउनका लागि अल्ट्रासाउन्ड तथा पाठेघरको मुखको क्यान्सर कारक ब्याक्टेरिया नष्ट गर्ने थर्मोकोअगुलेटर मशीन हस्तान्तरण गरेको छ। नगर प्रमुख शम्भु साहको विशेष पहलमा उक्त उपकरणहरू नर्सिङ स्टाफ सबनम खातुनलाई हस्तान्तरण गरिएको छ ।
गौर नगरपालिकाले ग्रामीण अल्ट्रासाउन्ड कार्यक्रम अन्तर्गत विशेषगरी गर्भवती महिला र गर्भमा रहेको शिशुको विकास सम्बन्धी स्वास्थ्य परीक्षणलाई सहज बनाउने उद्देश्यसहित अल्ट्रासाउन्ड मशीन उपलब्ध गराएको हो। साथै, पाठेघरको मुखमा हुने संक्रमणलाई समयमा नै पहिचान गरी उपचार गर्न थर्मोकोअगुलेटर मशीनको समेत व्यवस्था गरिएको छ।
नगर प्रमुख साहले कार्यक्रमलाई सम्बोधन गर्दै भने, “महिलाहरूको स्वास्थ्य सुरक्षा हाम्रो प्रमुख प्राथमिकता हो। हरेक वडामा मोबाइल स्वास्थ्य टोली परिचालन गरेर आधुनिक प्रविधि मार्फत परीक्षण तथा उपचार सेवा उपलब्ध गराइनेछ।”
स्वास्थ्य संयोजक दिनबन्धु यादवका अनुसार, गौर नगरपालिकाले VIA Screen Camp सञ्चालन गर्दै वडास्तरमै महिलाहरूको पाठेघरको मुखको क्यान्सर परीक्षण गर्ने योजना बनाएको छ। परीक्षणका क्रममा संक्रमण देखिएका महिलाहरूलाई तत्कालै थर्मोकोअगुलेसन विधि अपनाई उपचार गरिनेछ।
थर्मोकोअगुलेसन विधिबाट क्यान्सर उत्पन्न गर्ने हानिकारक ब्याक्टेरियालाई उच्च तापक्रमद्वारा नष्ट गरिन्छ, जसले संक्रमणको जोखिमलाई न्यूनीकरण गर्दै महिलाहरूको स्वास्थ्य सुरक्षामा महत्वपूर्ण योगदान पुर्याउनेछ।
नगरपालिकाले गर्भवती महिला तथा महिलासम्बन्धी रोगहरूको पहिचान र उपचारमा आधुनिक प्रविधिको प्रयोग गर्दै स्थानीय स्तरमै स्वास्थ्य सेवा विस्तार गर्ने लक्ष्य राखेको छ। हरेक वडामा नियमित रूपमा मोबाइल स्वास्थ्य टोली परिचालन गरिनेछ, जसले अल्ट्रासाउन्ड सेवा मार्फत गर्भवती महिलाहरूको स्वास्थ्य परीक्षण गर्नेदेखि लिएर पाठेघरसम्बन्धी समस्याहरूको समयमै पहिचान तथा उपचार गर्नेछ।
स्वास्थ्य संयोजक यादवले भने, “गाउँमै बसेर अत्याधुनिक प्रविधिको प्रयोग गरी महिलाहरूलाई सहज स्वास्थ्य सेवा उपलब्ध गराउने प्रयासमा गौर नगरपालिका क्रियाशील छ। यो कदमले महिलाहरूको स्वास्थ्य सुधारमा महत्वपूर्ण योगदान पुर्याउनेछ।” स्थानीय महिलाहरूले पनि यस प्रकारको सेवाको सुरुवातलाई स्वागत गरेका छन्।
