सर्लाही, पुस २३ – सर्लाहीको ईश्वरपुर नगरपालिकामा पहिलो पटक आफ्नै अस्पतालमा ५० जना आँखाका बिरामीको मोतियाबिन्दु तथा मासु पलाएको बिरामी सशुल्क अपरेशन गरिएको छ। नेपाल नेत्र ज्योती संघ, भरतपुर आँखा अस्पताल र ईश्वरपुर नगरपालिकाको संयुक्त सहकार्यमा ईश्वरपुरमा संचालित आँखा उपचार केन्द्र ईश्वरपुर ९ खोरियाटोलमा एक महिनामा ३ सय ४० ले आँखा परिक्षण गराएका थिए । जसम्धे ५० जना बिरामीको आज अपरेशन गरिएको आँखा उपचार केन्द्र ईश्वरपुरका प्रमुख चन्दन मणि रामले जानकारी दिनुभयो ।
नगर प्रमुख मनोज कुमार आचार्यका अनुसार, ईश्वरपुर नगरपालिकाको सहयोगमा भरतपुर आँखा अस्पतालले शिविर संचालन गर्दै बिरामीहरूको पहिचान गरेको थियो। त्यस पश्चात् ईश्वरपुरमै अपरेशन सेवा प्रदान गरिएको मेयर आचार्यले भन्नुभयो । “ईश्वरपुरमा पहिलो पटक आफ्नै अस्पतालमा मोतियाबिन्दुको अपरेशन गरिएको छ, जसले नगरपालिकाका नागरिकलाई सहज र सुलभ स्वास्थ्य सेवा उपलब्ध गराउने हाम्रो प्रतिबद्धता झल्काएको नगर प्रमुखले भन्नुभयो ।”
यस अपरेशनले मुख्यतया वृद्धवृद्धा, आर्थिक रूपमा कमजोर नागरिक र दुर्गम क्षेत्रका बासिन्दालाई ठूलो राहत दिएको छ। मोतियाबिन्दुका कारण दृष्टि गुमाउन थालेका बिरामीहरूले नगरपालिकाको यस पहललाई अत्यन्तै सकारात्मक रूपमा लिएका छन्। बिरामीहरूमध्ये धेरैले पहिले लामो दूरी पार गरेर उपचारका लागि अन्य स्थान जानुपर्ने बाध्यता रहेको थियो ।
नगर प्रमुख आचार्यले, “स्वास्थ्य सेवामा पहुँच अभिवृद्धि गर्न हामीले अस्पताललाई आवश्यक उपकरण र जनशक्तिले सुसज्जित बनाउँदै लैजाने बताउनुभयो ।”
आँखा शिविर र अपरेशनले स्थानीय बासिन्दाहरूलाई स्वास्थ्य सेवामा पहुँच वृद्धि गर्ने दिशामा ठोस कदम चालेको छ। यस प्रकारका सेवाले समुदायमा स्वास्थ्य चेतना वृद्धि गर्ने र आर्थिक रूपमा कमजोर परिवारलाई प्रत्यक्ष रूपमा लाभान्वित गर्ने विश्वास गरिएको छ।
नगरपालिकाको यो पहलले ईश्वरपुरलाई स्वास्थ्य सेवा प्रवाहको नमुना क्षेत्रका रूपमा चिनाउन महत्वपूर्ण योगदान पु¥याएको ईश्वरपुरका युवा नाथुराम चौधरीले जानकारी दिनुभयो ।
