रोनिश कार्की स्मृति प्रतिष्ठानले दियो ४० बालबालिकालाई शैक्षिक सामाग्रीसहित न्यानो कपडा
सर्लाही ।स्वर्गीय रोनिश कार्की स्मृति प्रतिष्ठान हरिवनले ४० जना बालबालिकालाई शैक्षिक सामाग्रीसहित जाडोमा लगाउन न्यानो ट्रयाकसुट वितरण गरेको छ ।प्रतिष्ठानले हरिवन नगरपालिका ९ मा रहेको देउराली प्राथमिक विद्यालयका ४० जना बालबालिकालाई कापी, डटपेनलगायतका शैक्षिक सामाग्रीसहित न्यानो ट्रयाकसुट प्रदान गरेको हो ।
प्रतिष्ठानका अध्यक्ष विनोद कार्कीले हरिवन नगरपालिकाका मेयर रमेश बुढाथोकी(कमल) को प्रमुख आतिथ्यतामा विद्यालयमै पुगेर शैक्षिक सामाग्रीसहित न्यानो ट्रयाकसुट वितरण गरिएको बताए । कार्यक्रममा हरिवन ८ का वडाध्यक्ष प्रज्वल ढुङ्गाना र ९ का वडाध्यक्ष कोकिलानन्द उप्रेती, वडा नम्बर ८ का पूर्व वडाध्यक्ष यज्ञविनोद ढुङ्गेल, महादेव जनता मावि हरिवनका प्रध्यानाध्यापक गिरिराज राणाको उपस्थिति रहेको थियो ।
त्यस्तै कार्यक्रममा देउराली प्राथमिक विद्यालयका पूर्व प्रध्यानाध्यापक यमनाथ उप्रेती, विद्यालय व्यवस्थापन समितिका पदाधिकारी शिक्षक अभिभावकलगायतको उपस्थिति रहेको कार्यक्रम सञ्चालक भरत कुमार कार्कीले जानकारी दिए ।प्रतिष्ठानले हरेक वर्ष स्वर्गीय रोनिश कार्कीको स्मृतिमा विभिन्न सामाजिक कार्य गर्दै आईरहेको उनका बुबा राजन कार्कीले बताए । स्वर्गिय कार्कीको २०७५ आषाढ १० गते एसईईको नतिजा आएपछि सुकेपोखरीस्थित मन्दिर पुगेर फर्कने क्रममा सवारी दुर्घटनामा परी निधन भएको थियो ।
