जबरजस्ती विवादमा तानेर मेरो चरित्र हत्या गर्ने प्रयास भएको छ

चैत्र ९ गते । नेपाल होस् या भूगोलको कुनै पनि ठाउँ समाजसेवीहरुको ठुलो सम्मान हुने गर्दछ र गर्नु पनि पर्दछ । तर सर्लाहीको बरहथवा ३ हजरियामा भने एक जना समाजसेवीलाई जबरजस्ती विवादमा तानेर चरित्र हत्या गर्ने प्रयास भएको छ ।
काठमाण्डौं बस्दै आउनु भएका युवा व्यवसायी समाजसेवी नवराज आचार्यलाई बरहथवा ३ हजरियास्थित सरस्वती माविमा पूर्वसहमति अनुसार नै स्थापना गर्न लागिएको उहाँको हजुरबुवा बासुदेव उपाध्यायको अर्धकदको शालिकको विषयलाई लिएर जबरजस्ती विवादमा तान्दै चरित्र हत्या गर्ने प्रयास भएको हो ।
‘मैले कसैलाई प्रभाव या प्रलोभनमा पारेर शालिक राख्न खोजेको होईन । तत्कालीन समयका विद्यालय व्यवस्थापन समितिका अध्यक्ष पञ्चानन्द भारती, उच्च मावि सञ्चालन सर्वदलीय संयन्त्रका संयोजक शंकर दाहाल, विद्यालयका प्रधानाध्यापक पुहुपनारायण महतो र प्रस्ताव लिएर आउने टोलीका सदस्य गणेश कार्की, भोला सहनी, दिवाकर खड्का(दिवंगत भईसक्नु भएको) र हजरियाका बुद्धिजीवी, भद्रभलाद्मीहरुकै अनुरोधमा विद्यालयमा सरस्वतीको मन्दिर बनाई दिए हजुरबुबाको शालिक राख्न दिने भनेर नै अहिले शालिक स्थापना गर्न खोजेको हुँ ।’, समाजसेवी आचार्यले भन्नुभयो,‘अहिले प्रभाव र प्रलोभनमा पारेर शालिक राख्न खोजियो भनेर प्रचार गरिँदैछ यसमा सत्यता छैन ।’
उहाँले आफूले सो समयमा खाई नखाई जोडेको बरहथवा बजारमा रहेको घडेरी बेचेर मन्दिर बनाएको बताउनुभयो । ‘विद्यालय र यहाँका भद्रभलाद्मीहरुबाट आग्रह भई आएपछि मैले उहाँहरुको आग्रहलाई नकार्न सकिँन । ‘आफै पढेको विद्यालय त्यसमाथि सबैले विद्यालयमा सरस्वतीको मन्दिर बनाउ र त्यसबेलामा सबैले माने पुजेको सबैको पूज्य गुरु स्वर्गिय हजुर बुबा बासुदेव उपाध्यायको शालिक ल्याएर राख’ भनेपछि जग्गा बेचेको १२ लाख र त्यसमा अपुग ५ लाख जति थपेर १७ लाख जतिमा मन्दिर बनाएँ । उतिबेलै शालिक ल्याएर राख्न सकिएन । अहिले आफू सक्षम भएपछि शालिक ल्याएर राख्दा जबरजस्ती विवादमा तान्ने प्रयास गरियो ।’ समाजसेवी आचार्यले भन्नुभयो, ‘मैले विभिन्न सञ्चारमाध्यममा प्रकाशित समाचारहरु हेरेँ, दुःख लाग्यो । आफ्नै गाउँ ठाउँको लागि केही गरौं भन्ने भावना राख्दा म माथि यतिको अन्याय भयो ।’
शालिक राख्ने विषयलाई यसरी विवादित बनाउन नहुने बताउनुहुँदै विद्यालय व्यवस्थापन समितिका वर्तमान अध्यक्ष यज्ञ खड्काले पूर्व सहमति अनुसार नै शालिक राख्न दिएको बताउनुभयो । उहाँले भन्नुभयो,‘उहाँ शालिक राख्न आउनुभयो र तत्कालीन समयमा भएको सहमति सुनाउनु भयो । मैले त्यसबेलाका प्रअ, विद्यालय व्यवस्थापन समितिका अध्यक्ष, उच्च मावि सञ्चालन सर्वदलीय संयन्त्रका संयोजक र मन्दिर बनाउने विषयमा प्रस्ताव लिएर जाने टोलीका सदस्यहरुसँग बुझ्दा उहाँहरुले शालिक राख्न दिने सहमति भएको हो भनेर भन्नुभएपछि नै शालिक राख्न दिइएको हो । उहाँले हामीलाई कुनै प्रलोभन र प्रभावमा पार्नु भएको होईन ।’
उहाँले सञ्चार माध्यमहरुमा आएको समाचारले आफूलाई समेत अच्चम्भित तुल्याएको बताउनुभयो । उहाँले भन्नुभयो,‘उहाँ एक्कासी आएर शालिक राख्ने भन्नुभयो, मैले राख्न दिएँ भनेर भनेको थिएँ तर समाचारमा अर्कै कुरा आयो ।’ उहाँले शालिक राख्ने विषयले विवादित रुप लिएपछि आफूले विद्यालय व्यवस्थापन समितिको बैठक राखेर सर्वदलीय छलफलपछि मात्रै निर्णयमा पुगिने निर्णय गरेको बताउनुभयो । उहाँले चैत्र ५ गते एक चरण छलफल भएको र फेरी पनि सर्वदलीय छलफल राख्ने र समाधानको बाटो खोज्ने बताउनुभयो ।
यता विद्यालय व्यवस्थापन समितिका तत्कालीन पूर्व प्रधानाध्यापक पुहुपनारायण महतोले शालिकको विषयमा अनावश्यक विवाद नगर्न आग्रह गर्नुभयो । उहाँले भन्नुभयो,‘यो विषयमा अनावश्यक विवाद गर्नु जरुरी नै छैन । तत्कालीन समयमा विद्यालय सञ्चालनमा कठिनाई थियो । विद्यालय सञ्चालनका लागि स्रोत जुटाउने क्रममा हामीले नै नवराज आचार्यलाई सरस्वतीको मन्दिर बनाई दिनु र शालिक ल्याएर राख्नु भनेका हौं । त्यतिबेलाको निर्णय बदर गर्नु पर्ने भए अरु पनि निर्णय बदर गर्दा भई हाल्यो नि । त्यहाँ अन्य सहयोग पनि आएका छन् । भारतीय दुतावासको सहयोगमा बनेका भवनहरु पछि छन् के अब तिनलाई पनि हटाउने कुरा त हुँदैन होला नि ?’ उहाँले नवराज आचार्य गलत मान्छे नभएको र उनको सहयोगको हजरियावासीले उच्च सम्मान गर्नु पर्ने बताउनुभयो ।
त्यस्तै तत्कालीन समयका विद्यालय व्यवस्थापन समितिका अध्यक्ष पञ्चानन्द भारतीले पनि शालिक स्थापनाको विषयलाई विवाद तान्नु गलत भएको बताउनुभयो । उहाँले सबै काम सहमति अनुसार नै भएकोले यो विषयमा विवाद झिकेर मिडियावाजी गर्नु उपयुक्त नभएको बताउनुभयो ।
त्यस्तै तत्कालीन समयका उच्च मावि सञ्चालन सर्वदलीय संयन्त्रका संयोजक शंकर दाहालले केही मान्छेहरुले राजनीतक अभिष्ट पूरा गर्न शालिकको विषयलाई उचालेको बताउनुभयो । उहाँले भन्नुभयो,‘नवराज भाईले रातारात आएर कसैले थाहा नपाउने गरी जबरजस्ती शालिक राख्नु भएको होइन । त्यतिबेला हामीले उहाँसँग गरेको सहमति अनुसार नै उहाँले शालिक राख्नु भएको हो । विद्यालय र शालिकको कुनै सम्बन्ध छैन । मन्दिर बनाउन शालिक राख भनेपछि शालिक राखिएको हो । मन्दिर नबनेको भए अहिले शालिक पनि हुँदैनथ्यो ।’
त्यस्तै हजरियाकै स्थानीय समेत रहनु भएका कानून व्यवसायी रमेश प्रसाद न्यौपानेले शालिक राख्न दिन्छु भनेपछि दिनु पर्ने र अहिले विवाद झिक्न नहुने बताउनुभयो । ‘नवराज भनेको जिरोबाट हिरो भएको मानिस हो । उनको हजुरबुवा पनि हजरियावासीले पुज्ने गरेकै व्यक्ति हुन् । सहमति अनुसार उहाँको शालिक राख्न त्यसले कसैलाई हानी गर्दैन ।’ उहाँले मन्दिर र शालिक भनेको अब हजरियावासीको सम्पदा भएकोले त्यसको संरक्षण गर्नु पर्नेमा जोड दिनुभयो ।
त्यस्तै सोही विद्यालय व्यवस्थापन समितिका पूर्वअध्यक्ष नेत्र काफ्लेले पूर्वसहमति अनुरुप शालिक स्थापना गरेर नवराज आचार्यले कुनै गल्ती नगरेको बताउनुभयो । स्थानीय भोला सहनी, नरनारायण सहनीलगायतका बहुसंख्यक हजरियावासीले सहमति अनुसार नवराजलाई आफ्नो हजुर बुबाको शालिक स्थापना गर्न दिनु पर्ने बताउनुभयो । उहाँहरुले त्यसबेलाका जिम्मेवार र आधिकारीक व्यक्तिहरु, सर्वदलीय संयन्त्र र विद्यालय व्यवस्थापन समितिले गरेको निर्णयमा आँच पु¥याउने अधिकार अहिलेको व्यवस्थापन समिति र अन्य कसैलाई पनि नरहेको बताउनुभयो । उहाँहरुले तत्कालीन सहमति कार्यान्वयन गरेर अहिलेको व्यवस्थापन समिति र यहाँका राजनैतिक दलले पूर्ण जवाफदेहिता लिन सक्दा मात्रै उबेलाका सम्मानित व्यक्तिहरुप्रति उच्च सम्मान हुने बताउनुभयो ।
हजरियावासीका अनुसार नवराज आचार्य सरस्वती मावि कै पूर्व विद्यार्थी हुनुहुन्छ । बालखैमा बुवा वितेर टुहुरो हुनुभएका आचार्य हजुरबुवा बासुदेव उपाध्यायको छत्रछायाँमा हुर्कनुभयो । उहाँ पढाईमा अब्बल हुनुहुन्थ्यो । आफ्नै मेहनत र परिश्रमले उहाँ अहिले समाजसेवा गर्न सक्ने हैसियतको बन्नु भएको छ ।
उहाँले हालसालै पनि झण्डै ८ लाख बराबरको खर्चमा ४ सय जति साईकल राख्न मिल्ने साईकल स्ट्याण्ड बनाई दिनुभएको विद्यालयले जनाएको छ । विद्यालय व्यवस्थापन समितिका अध्यक्ष यज्ञ खड्का भन्नुभयो,‘शालिक लिएर आउँदा हामीले विद्यालयमा लाईब्रेरी व्यवस्थित गर्ने, बालबालिकालाई बसेर खाजा खान डाईनिङ्ग हल बनाउनु पर्ने र साईकल स्ट्याण्ड आवश्यक भएको बतायौं र ती मध्ये तत्कालै बनाउनुपर्ने साईकल स्ट्याण्ड बनाई दिन आग्रह ग¥यौं । उहाँले हाम्रो आग्रहलाई सहजै स्वीकार गर्नुभयो र बनाई दिनुभयो ।’ अध्यक्ष खड्काले विद्यालयमा दिनदिनै जस्तो साईकल चोरी हुने हराउने गरेकोले आफूहरुले साईकल स्ट्याण्ड बनाई दिन आग्रह गरेको बताउनुभयो ।’
यता, शालिकको विषयमा आफ्नो समेत नाम जोडेर समाचार प्रकाशन भएपछि एमाले नेता रेवती पन्तले पनि प्रतिक्रिया दिनुभएको छ । उहाँले भन्नुभयो,‘सबै बसेर छलफल गरे विवाद टुंगिने भएपनि यो गुट, त्यो गुट, यसको प्रभाव उसको प्रभाव भनेर मिडियावाजी गरेर यो विषय जबरजस्त विवादित बनाउने प्रयास भएको जस्तो देखिन्छ । यो विषयलाई राजनीतिकरण गर्नुभन्दा पनि हजरियावासी आफैले निकास निकाल्नु पर्ने मेरो सुझाव छ ।’
यो विषयमा बरहथवा नगरपालिकाका पूर्व मेयर देवानन्द रायले पनि चासो देखाउनु भएको छ । उहाँले यो विषय समयमै नसुल्झाए यसले झडपको रुप लिन सक्ने समेत अनुमान गर्नुभएको छ । उहाँले भन्नुभयो,‘यहाँका जनप्रतिनिधिहरुले चासो नदेखाउँदा र यस्ता विषयलाई सामान्य ठान्दा यसअघि पनि बरहथवामा गोलि काण्ड भएको थियो । अहिले शालिकको विषय पनि पेचिलो बन्दै गएको छ तर यहाँका जनप्रतिनिधिले यसलाई सामान्य ठानेको मैले महसुस गरेको छु । यो विषय छिटो सुल्झाउन समेत म जनप्रतिनिधिहरुलाई आग्रह गर्दछु ।