सर्लाही,२१ चैत्र । सर्लाहीको चन्द्रनगर गाउँपालिका–६ स्थित जिल्लाकै प्रसिद्ध प्राकृतिक रूपमा निर्मित नाढीमन तालमा जिल्ला विपद् व्यवस्थापन समितिको आयोजनामा बाढी तथा आगलागी प्रतिकार्य सम्बन्धी संयुक्त अभ्यास सम्पन्न भएको छ।
जिल्ला विपद् व्यवस्थापन समिति सर्लाहीको आयोजना र चन्द्रनगर गाउँपालिकाको सहकार्यमा सम्पन्न अभ्यासमा बाढीजन्य तथा आगलागीजन्य विपद् व्यवस्थापनका विविध उपायहरुको प्रदर्शन गरिएको थियो।
बाढीजन्य विपद् व्यवस्थापनको पहिलो चरणमा सुरक्षित स्थानबाट डोरीको सहायताले बाढीले बगाएका व्यक्तिहरूको उद्दार गरियो। साथै, विपद् समयमा स्थानीयस्तरमा उपलब्ध स्रोत साधनको प्रयोग गरी तैरिन सक्ने तरिकाको प्रदर्शन, रबर बोटको प्रयोग, लाइफबोयद्वारा डुबिरहेका व्यक्तिहरूको उद्दारजस्ता अभ्यास गरियो।
अभ्यासको दोस्रो चरणमा आगलागी नियन्त्रणसम्बन्धी गतिविधिहरू प्रदर्शन गरियो। ग्यास सिलिन्डरमा लागेको आगोलाई औंला, बाल्टिन र फायर ब्ल्याङ्केटको प्रयोग गरी निभाउने विधिहरू देखाइयो। गाउँबस्तीमा आगलागी भएमा जिल्ला सुरक्षा निकायहरूको संयुक्त टोली परिचालन तथा आगो नियन्त्रणसम्बन्धी अभ्यास गरियो।
चन्द्रनगर गाउँपालिकाका अध्यक्ष राजकुमार महतोले जिल्लाकै पहिलो प्राकृतिक ताल नाढीमनमा यस्तो अभ्यास सम्पन्न हुनुले गाउँपालिकालाई विपद् व्यवस्थापनमा ठूलो सहयोग पुग्ने बताउनुभयो। साथै, चन्द्रनगर गाउँपालिका बाढी र आगलागीका दृष्टिले उच्च जोखिमयुक्त क्षेत्र भएकाले यस्ता अभ्यास अत्यन्तै महत्वपूर्ण रहेको उहाँको भनाइ छ।
नाढीमन ताललाई पुनः जीवन दिने उद्देश्यले आठ करोड रुपैयाँको बजेट परिचालन भईसकेको अध्यक्ष महतोले बताउनुभयो। उहाँले ताललाई राष्ट्रिय तथा अन्तर्राष्ट्रिय रूपमा चिनाउन आवश्यक पहल भइरहेको जानकारी गराउँदै विपद् व्यवस्थापन समितिले अभ्यासका लागि नाढीमन ताललाई छनोट गरेकोमा विशेष धन्यवाद प्रकट गर्नुभयो।
संयुक्त अभ्यासमा नेपाल प्रहरी, सशस्त्र प्रहरी बल, नेपाली सेनाका टोलीहरूको उल्लेखनीय सहभागिता रहेको थियो।
कार्यक्रममा प्रमुख जिल्ला अधिकारी तुलसी बहादुर श्रेष्ठ, जिल्ला प्रहरी कार्यालयका प्रहरी उपरीक्षक रविन्द्र बहादुर सिंह, सशस्त्र प्रहरी बल १० नम्बर गणका सशस्त्र प्रहरी उपरीक्षक देव बहादुर चन्द, नेपाली सेना भैरवी गणका प्रमुख सेनानी सूर्य बहादुर कार्की, वडा अध्यक्ष सिताराम महतो, स्थानीय जनप्रतिनिधि तथा पत्रकारहरूको उपस्थिति रहेको थियो।
