जापानविरुद्ध हुने सैनिक परेडमा ओली सहभागी हुने कुरा असंलग्न परराष्ट्र नीतिको खिलाफमा छ : प्रभु साह
काठमाडौं, १३ भदौ । आम जनता पार्टी (आजपा)का अध्यक्ष एवं पूर्वमन्त्री प्रभु साहले प्रधानमन्त्री केपी शर्मा ओलीले कुटनीतिक कौशलता देखाउन नसकेको टिप्पाणी गरेका छन् ।
काठमाडौंको कोटेश्वरमा आज (शनिबार) आजपा बागमती प्रदेश कमिटीको बिस्तारित बैठकलाई सम्बोधन गर्दै अध्यक्ष साहले चीन भ्रमणमा जानुअघि राष्ट्रिय सहमति र म्याण्डेट लिनुपर्नेमा ओलीले कांग्रेस नेतृत्वसँगपनि परामर्श गरेको थाहा नभएको बताए ।
‘प्रधानमन्त्री केपी ओलीले कुटनीतिक कौशलता देखाउन सक्नुभएन, जापानविरुद्ध हुने सैनिक परेडमा सहभागी हुने कुरा असंलग्न परराष्ट्र नीतिको खिलाफमा छ, जापान नेपालको विकास साझेदार मुलुक हो । निशर्त सहयोग गर्दै आएको छ,’ आजपा अध्यक्ष साहले भने ।
प्रधानमन्त्री ओलीले संसद्को रोष्ट्रममा उभिएर भारत र चीनबीचको पछिल्लो सहमतिबारे नबोलेको र सिमा विवाद समाधान बारेमा कुनै प्रतिबद्धता समेत व्यक्त नगरेको उनले बताए । आजै चीन भ्रमणमा नेपाली प्रतिनिधिमण्डलको नेतृत्व गर्दै चीन प्रस्तान गरेका ओलीले शुक्रबार संसदमा सम्बोधन गर्दा भारत र चीनबीचको पछिल्लो सहमतीबारेमा किन नबोलेको भन्दै उनले प्रश्न उठाए ।
नेकपा एमाले अध्यक्ष समेत रहेका प्रधानमन्त्री ओली झुटको सरदार भएको टिप्पणी समेत साहले गरे । केही समय अघि ओली आफैले विद्या भण्डारी एमालेमा फर्कन हुन्छ भनेको भिडिओ भाइरलले ओली झटको सरकार भएको पुष्टि भइसकेको उनले बताए ।
‘पहिले आफै विद्या भण्डारी राजनीतिमा फर्कन मिल्छ भन्ने ओली अहिले विद्यासँग हार्ने निश्चित् भएपछि डराएर राजनीतिमा आउन हुँदैन भनेर पार्टी पंक्तिलाई प्रयोग गर्ने काम गर्नुभयो । राजनीतिक विश्वास गुमाउनुभयो,’ आजपा अध्यक्ष साहले भने, ‘विद्या भण्डारीबाट आफ्नो राजनीतिक करियर नै समाप्त हुने भयले अहिले ओलीले विद्या भण्डारीमाथि एकोहोरो प्रहार गर्न थालेका छन् । प्रभ साहसँग त डराउनुभयो, हामीले काम नलाग्ने भनेर पार्टीबाट निकालेका फोहोर, दुर्गन्धलाई बोकेर ओलीजी हिँड्नुभएको छ ।’
मदन भण्डारी फाउण्डेशबाट राजनीतिमा उदाएका ओली अहिले सोही फाउण्डेका बिरुद्धमा विषवमन गरिरहेको टिप्पणी गर्दै साहले भने, ‘एमाले मदन भण्डारीको लिगेसीले चलेको हो, ओलीको नेतृत्व मदन भण्डारी फाउण्डेशनले नै स्थापित गरेको हो । अहिले त्यही फाउण्डेशनमाथि विषवमन गर्दै हिडिरहेका छन् ।’
पानीको हाहाकारले सुख्खाग्रस्त मधेसलाई सरकारले सुख्खाग्रस्त क्षेत्र घोषणा गरे पनि राहत प्याकेज नदिएर ओलीले मधेसी जनतालाई ढाँटने काम मात्रै गरेको उनले बताए । ‘मधेशी जनतालाई ढाँटे, सुख्खाग्रस्त क्षेत्रको लागि एउटा सिन्को पनि भाँचेनन् सरकारले, अहिले हैजाले वीरगञ्ज आतंकित छ, तर सरकारको उपस्थिति देखिएन,’ उनले भने ।
यस्तै उनले प्रधानमन्त्री ओली भारत भ्रमणमा जानुअघि नेपाली भूमि फिर्ता ल्याउँछु भनेर नेपाली जनतासँग कवुल गरेर मात्रै जानुपर्ने बताए । ‘नेपाली भूमि फिर्ता नल्याउने हो भने भारत किन जानुपर्ने ?’ उनले भने ।
नेपालीहरुको महत्वपूर्ण चाडपर्वहरु दशैं, दिपावली, छठ लगायतका पर्वहरु नजिक्दिै गइरहेको बताउदै उनले अहिलेदेखी नै सरकारले नेपाली जनतालाई पाइलापाइलामा लुटन सुरु गरिसकेको आरोप लगाए ।
‘अब चाडवाड सुरु भयो, यो सरकारले पाईला पाईलामा जनतालाई लुटिरहेको छ, चनाखो हुनुपर्छ । सरकारले कालोबजारी, मूल्यवृद्धि र कृत्रिम अभाव सिर्जना गर्नसक्छ, अब आईटी आर्मीले कदम चाल्नुपर्छ,’ साहले भने ।
आजपा बागमती प्रदेश कमिटीका उपाध्यक्ष पासाङ तामाङको अध्यक्षतामा बसेको बैठकमा आजपा सहअध्यक्ष एवं संविधानसभाका सदस्य तिलक थापामगर, प्रवक्ता चन्द्रभुषण साह, आजपा नेताहरु देवी पण्डित रेग्मी, तेजनारायण चौधरी, रञ्जु साह, राम बिष्ट, दिनेश किराती, गोपाल साह, देवकुमारी साह, मिनादेवी साह, बिन्दा कटुवाल, अमर लिम्बु, रुपसागर उपाध्याय लगायतको विशेष सहभागिता छ ।
