सर्लाही,१७ मंसिर। सर्लाहीमा ३४औँ अन्तर्राष्ट्रिय अपाङ्गता दिवस मनाइएको छ । सर्लाहीको मलंगवा, चन्द्रनगर लगायत जिल्लाका विभिन्न स्थानमा बुधबार अपाङ्गता दिवस मनाइएको छ ।
जिल्लाको चन्द्रनगर गाउँपालिकामा“अपाङ्गता–समावेशी समाजको प्रवर्द्धन : सामाजिक उन्नतिको संवर्द्धन” भन्ने राष्ट्रिय नाराका साथ दिवस मनाइएको हो ।
यस वर्षको अन्तर्राष्ट्रिय नारा “Fostering Disability-Inclusive Societies for Advancing Social Progress” (सामाजिक प्रगतिका लागि अपाङ्गता–समावेशी समाज निर्माण) रहेको छ । सो अवसरमा अपाङ्गता भएका व्यक्तिहरूका अधिकार, सहभागिता र समावेशीकरणका विषयमा छलफल गरिएको अपाङ्गता भएका व्यक्ति तथा समाजसेवी युवा शिवनाथ राउत काहारले जानकारी दिए ।
कार्यक्रममा अपाङ्गता भएका व्यक्तिहरू, स्थानीय , सामाजिक अभियन्ता तथा सर्वसाधारणको उल्लेखनीय सहभागिता रहेको थियो । दिवसको अवसरमा अपाङ्गता भएका व्यक्तिलाई समाजको मूलधारमा समावेश गर्दै उनीहरूको क्षमता र योगदानको सम्मान गर्नुपर्नेमा वक्ताहरूले जोड दिएका थिए ।
