भक्ती रिजाल
सर्लाही ।इलाका प्रहरी कार्यालय हरिवनका इन्सपेक्टर अनिल राज गिरीको प्रहरी हेडक्वाटरमा सरुवा भएको छ ।
इलाका प्रहरी कार्यालय हरिवनमा एक बर्षे कार्यकाल पूरा गरी इन्सपेक्टर गिरीको सरुवा भएको हो ।
अपराध अनुसन्धानको क्षेत्रमा लामो अनुभव बटुलेका गिरीले हरिवन रहदा विभिन्न खाले अपराधलाई न्युनीकरण गर्न अहम भुमिका खेलेको भन्दै स्थानीयले प्रशंसा गरेका छन् ।
जनताको अपेक्षा अनुरुप काम गर्ने शैली र इमान्दारिताका कारण हरिवनका जनताले इन्सपेक्टर अनिलराज गिरीलाई संझिरहने उध्योग बाणिज्य संघ हरिवनका अध्यक्ष प्रयागराज पोते बताउछन् ।
बिगतका दिनमा हरिवनमा सरुवा भएर आएका इन्सपेक्टरका तुलनामा गिरीले शान्ती सुरक्षा कायम गर्न खेलेको भुमिकाको चौतर्फी प्रशंसा भैरहेको बेलामा भएको गिरीको सरुवाले आगामी दिनको सुरक्षा ब्यबस्था कस्तो रहला भन्ने बारे स्थानीयले चासो ब्यक्त गरेका छन् ।
इन्सपेक्टरको रुपमा गिरी हरिवन आए संगै यस क्षेत्रमा शान्ती सुब्यबस्थामा सुधार आएको थियो भने अपराध, लागू औषध तस्करी, जुवा तास नियन्त्रण लगायतको गतिविधिमा उल्लेख्य सुधार भएको थियो ।
इन्सपेक्टर गिरीको हेडक्वाटरमा सरुवा भएसंगै इलाका प्रहरी कार्यालय हरिवनको प्रमुखको रुपमा किसोर तामाङ हाजिर भएका छन् ।
