प्रदिप कुमार दास, रौतहट ।
भदौँ ०८ गते , शनिबार ।
संघीय मामिला तथा सामान्य प्रशासन मन्त्रालयले आ.व. २०७९/०८० को स्थानीय तह संस्थागत क्षमता स्वमूल्यांकन (LISA) नतिजा सार्वजनिक गरेपछि रौतहट जिल्लाको गरुडा नगरपालिकाले उल्लेखनीय उपलब्धि हासिल गरेको छ। उक्त मूल्यांकनमा गरुडा नगरपालिकाले दोस्रो स्थान प्राप्त गर्दै स्थानीय शासन, प्रशासनिक दक्षता र सेवा प्रवाहमा महत्वपूर्ण प्रगति देखाएको छ।
LISA (Local Institution Self-Assessment) प्रक्रिया संघीय मामिला तथा सामान्य प्रशासन मन्त्रालयद्वारा प्रत्येक वर्ष सञ्चालन गरिन्छ, जसमा स्थानीय तहहरूले विभिन्न १० शीर्षकअन्तर्गत आफ्नो कार्यप्रगति र सेवा प्रवाहको विवरण प्रस्तुत गर्नुपर्ने हुन्छ। यस मूल्यांकनको मुख्य उद्देश्य भनेको स्थानीय तहहरूको प्रशासनिक क्षमता, वित्तीय व्यवस्थापन, सेवा प्रवाह, सामाजिक समावेशिकरण, र भौतिक पूर्वाधार विकास लगायतका क्षेत्रहरूको समग्र प्रदर्शनलाई मूल्यांकन गर्नु हो।
मन्त्रालयको पछिल्लो मूल्यांकनमा गरुडा नगरपालिकाले उच्च अंक प्राप्त गर्दै रौतहट जिल्लामा दोस्रो स्थानमा आफ्नो स्थान सुरक्षित गरेको छ। यस उपलब्धिले नगरपालिकाको स्थानीय शासनप्रतिको प्रतिबद्धता, पारदर्शिता, र सेवा प्रवाहमा भएको सुधारलाई उजागर गरेको छ। नगर प्रमुख कन्थमनि प्रसाद जयसवालको नेतृत्वमा गरुडा नगरपालिकाले यस क्षेत्रको विकासमा उच्च प्राथमिकता दिँदै आएका छन्।
नगर प्रमुख जयसवालले आफ्नो कार्यकाल सम्हालेदेखि नै नगरपालिकाले सेवाप्रवाहमा पारदर्शिता, कार्यकुशलता, र सुशासनलाई मुख्य प्राथमिकतामा राख्दै आएको बताए। उनले LISA मूल्यांकनको महत्त्वलाई जोड दिँदै भने, “हामीले हाम्रा कामहरूको मूल्यांकनलाई नियमितरूपमा आत्मसमीक्षा गरिरहेका छौं। यो प्रक्रिया नगरपालिकालाई अझै बढी जिम्मेवार र जनताको अपेक्षासँग सामञ्जस्यमा राख्न महत्त्वपूर्ण साबित भएको छ।”
उक्त मूल्यांकनमा नगरपालिकाका कार्यालय प्रमुख मुहम्म्द मुस्ताक अलाम र सम्पूर्ण शाखा प्रमुखहरूले महत्त्वपूर्ण भूमिका खेलेको नगर प्रमुख जयसवालले स्वीकारे। उनले भने, “LISA मूल्यांकनमा हामीले प्राप्त गरेको यो सफलता हाम्रो सम्पूर्ण टिमको कठिन परिश्रमको परिणाम हो। म सम्पूर्ण कर्मचारीलाई धन्यवाद दिन चाहन्छु, जसले नगरपालिकाको कार्यसम्पादनलाई उत्कृष्ट बनाउन हरसम्भव प्रयास गरे।”
यस मूल्यांकनको सफलतापछि नगर प्रमुख जयसवालले आगामी दिनमा पनि नगरपालिकाको सेवाप्रवाह र विकासका प्रयासहरूलाई अझ सशक्त बनाउने प्रतिबद्धता व्यक्त गरे। साथै, उनले नगरपालिकाका सम्पूर्ण कर्मचारीहरूलाई आगामी दिनहरूमा अझै बढी परिश्रम र समर्पणसाथ कार्य गर्न प्रेरित गरे।
संघीय मामिला तथा सामान्य प्रशासन मन्त्रालयको यो मूल्यांकनले देशभरका स्थानीय तहहरूको कार्यक्षमतामा सुधार ल्याउने र तिनका बीचमा स्वस्थ प्रतिस्पर्धाको भावना विकास गर्ने विश्वास गरिन्छ। LISA प्रणालीको माध्यमबाट स्थानीय तहहरूको कामको स्वमूल्यांकन गर्ने प्रक्रिया अझ प्रभावकारी बन्दै गएको र यसले स्थानीय तहहरूलाई थप सुदृढ र जवाफदेही बनाएको विश्लेषकहरूको धारणा छ।
गरुडा नगरपालिकाले दोस्रो स्थान हासिल गर्नुले यस क्षेत्रको विकास र समृद्धिको दिशामा ठोस कदमहरू उठाउँदै आएको प्रमाणित भएको छ। यसले आगामी वर्षहरूमा नगरपालिकाको नेतृत्वलाई अझै बढी प्रेरणा प्रदान गर्ने र विकासका नयाँ आयामहरू खोज्न प्रेरित गर्ने विश्वास नगर प्रमुख जयसवालले व्यक्त गरेका छन्।
