सिसवा धमौरा जय माँ दुर्गा पूजा समितिलाई मेयर कुर्मीले गरे रू. १ लाखको चेक हस्तान्तरण
मेयर कुर्मीले गरे सहयोग स्वरूप रू. १ लाखको चेक हस्तान्तरण
प्रदिप कुमार दास, रौतहट ।
असोज १९ गते, शनिबार ।
रौतहट जिल्लाको वृन्दावन नगरपालिका-६ सिसवा धमौरा गाउँस्थित ऐतिहासिक दुर्गा मन्दिरमा नगर प्रमुख बिनोद प्रसाद कुर्मीले विशेष पूजा अर्चना गर्दै स्थानीय धार्मिक, सांस्कृतिक गतिविधिहरूलाई निरन्तरता दिने प्रतिबद्धता जनाउनु भएको छ। दुर्गा मन्दिर, जुन यस क्षेत्रको सबैभन्दा पुरानो धार्मिक स्थल मानिन्छ, हरेक वर्ष दुर्गा पूजाका अवसरमा हजारौं भक्तजनको उपस्थितिको साक्षी रहँदै आएको छ।
नगर प्रमुख कुर्मीले उक्त मन्दिरमा पूजाआजा गर्दै, जय माँ दुर्गा पूजा समिति गरुडा/वृन्दावन नगरपालिकाका मेला समितिसँगको आफ्नो प्रतिबद्धता पुरा गर्न रु. १ लाखको चेक हस्तान्तरण गरेका छन्। यो रकम दुर्गा पूजा मेलाको सफल आयोजना र व्यवस्थापनका लागि सहयोग स्वरूप प्रदान गरिएको हो। उक्त चेक हस्तान्तरण मेला समिति अध्यक्ष एवं वृन्दावन नपा-६ सिसवाका वडा सदस्य महेन्द्र दासलाई सम्पूर्ण मेला समितिको उपस्थितिमा गरिएको थियो।
नगर प्रमुख कुर्मीले जनताको सेवामा सधैं उत्तरदायी र विकासप्रेमी रहँदै आएको देखाउँदैं धार्मिक तथा सांस्कृतिक कार्यक्रमहरूको प्रवर्द्धनमा निरन्तर योगदान गर्दै आएका छन्। उनले दुर्गा मन्दिरको महत्त्वलाई उल्लेख गर्दै भविष्यमा अझ धेरै सहयोग गर्ने वाचा गरे। यस कार्यलाई मेला समितिका सदस्य र स्थानीय बासिन्दाहरूले निकै उच्च मूल्यांकन गर्दै मेयर कुर्मीप्रति आभार व्यक्त गरेका थिए।
चेक हस्तान्तरण कार्यक्रममा मेला समिति अध्यक्ष महेन्द्र दास, प्रमुख मेला व्यवस्थापक राजकुमार दास, सचिव बिसुनदयाल राय, कोषाध्यक्ष सिकिन्दर दास, सहसचिव रामप्रवेश यादव लगायतका मेला व्यवस्थापनका प्रमुख व्यक्तित्वहरू उपस्थित थिए। यस कार्यक्रममा स्थानीय समाजका विभिन्न बुद्धिजीवी, सञ्चारकर्मीहरू तथा भद्रभलादमीहरूको पनि उल्लेखनीय उपस्थिति रहेको थियो।
कार्यक्रमका प्रमुख वक्ताहरूले मेला समितिका सदस्यहरूले गरेका योगदानहरूको प्रशंसा गर्दै नगर प्रमुख कुर्मीको सहयोगले यसपटकको दुर्गा पूजालाई अझ भव्य र सफल बनाउन मद्दत गर्ने आशा व्यक्त गरेका थिए। धार्मिक उत्सवहरूलाई संरक्षण गर्न र भविष्यमा पनि यस्ता सहयोग निरन्तर हुने विश्वास व्यक्त गर्दै कार्यक्रमको समापन गरिएको थियो।
