सर्लाही, ६ कार्तिक – सर्लाही जिल्लाको चन्द्रनगर गाउँपालिकामा मिथिला चित्रकलाको माध्यमबाट महिला सशक्तीकरणलाई प्रवर्द्धन गर्ने उद्देश्यले एक नयाँ परियोजना सुरु गरिएको छ। यस परियोजनाले १७ अगस्त २०२४ देखि १७ नोभेम्बर २०२५ सम्म सञ्चालन हुने जानकारी परियोजना संयोजक अर्जुन काफ्लेले मंगलबार एक परिचयात्मक कार्यक्रममा दिएका छन्।
यो परियोजना युएसआईडी र द एसिया फाउन्डेशनको सिएसएम परियोजनाअन्तर्गत नेपाल एकीकृत विकास समाज, लालबन्दीद्वारा सञ्चालन गरिनेछ। परियोजनाको मुख्य उद्देश्य लैंगिक तथा जातीय विभेदलाई न्यूनीकरण गर्ने, स्थानीय सरकारको कार्यक्रमहरूमा महिलाको सहभागिता अभिवृद्धि गर्ने, साथै मिथिला चित्रकला र परम्परागत हस्तकलालाई प्रवर्द्धन गर्ने रहेको छ।
परियोजना परिचयात्मक कार्यक्रममा चन्द्रनगर गाउँपालिकाका अध्यक्ष राजकुमार महतो, उपाध्यक्ष गिता देवी महतो, र प्रमुख प्रशासकीय अधिकृत वकिल प्रसाद पाल लगायत विभिन्न जनप्रतिनिधिहरूको उपस्थिति रहेको थियो। परियोजनाका संयोजक अर्जुन काफ्लेले मिथिला चित्रकलाले महिलाहरूलाई सशक्त बनाउन मद्दत गर्ने र उनीहरूको आर्थिक अवस्था सुधार गर्न सहयोग पुर्याउने बताए। साथै, यस परियोजनाले महिलाहरूलाई परम्परागत सीप र कला प्रयोग गर्न प्रेरित गर्ने लक्ष्य राखेको छ, जसले उनीहरूको आर्थिक तथा सामाजिक स्थिति सुधार्न महत्वपूर्ण योगदान दिनेछ।
परियोजनाको अर्को महत्त्वपूर्ण पक्ष भनेको समुदायमा महिलाको भूमिका बढाउँदै लैंगिक असमानताको अन्त्य गर्नु हो। परियोजना अवधिमा महिलाहरूलाई चित्रकला सम्बन्धी तालिम प्रदान गरिनेछ, जसले उनीहरूको सीपलाई व्यावसायिक स्वरूप दिन सहयोग पुग्नेछ। यसैगरी, हस्तकलाका उत्पादनहरूलाई पनि बजारमा पुर्याएर महिलाहरूको आम्दानी वृद्धि गर्ने योजना रहेको छ।
कार्यक्रममा उपस्थित चन्द्रनगर गाउँपालिकाका अध्यक्ष राजकुमार महतोले यस्तो परियोजना गाउँपालिकाका महिलाहरूको जीवनस्तर उकास्न महत्वपूर्ण हुने बताए। उपाध्यक्ष गिता देवी महतोले महिलाको सशक्तीकरणले परिवार र समाजमा सकारात्मक परिवर्तन ल्याउने विश्वास व्यक्त गरिन्। प्रमुख प्रशासकीय अधिकृत वकिल प्रसाद पालले परियोजनाले महिला सशक्तीकरण र समग्र समुदायको विकासमा महत्वपूर्ण योगदान पुर्याउने धारणा राखे।
परियोजनाका अन्तर्गत महिलाको सीप विकासमा मात्र नभई उनीहरूको अधिकार र समानताको सुनिश्चिततामा पनि ध्यान दिइनेछ। यसले महिलाहरूलाई आत्मनिर्भर बन्न प्रेरित गर्नेछ र उनीहरूको निर्णय क्षमतामा सुधार ल्याउनेछ।
