सर्लाही, १५ माघ – सर्लाही जिल्लाको ईश्वरपुर नगरपालिका स्थित सरस्वती माध्यमिक विद्यालय भक्तिपुरले आफ्नो ६०औं वार्षिकोत्सव ‘हीरक महोत्सव’ आगामी माघ महिनाको १९ गतेदेखि तीन दिनसम्म भव्य रूपमा मनाउने घोषणा गरेको छ। महोत्सवको उद्घाटन मधेश प्रदेशका मुख्यमन्त्री शतिस कुमार सिंहले गर्नेछन्।
ईश्वरपुर नगरपालिकाका प्रमुख मनोज आचार्यका अनुसार, महोत्सवको दौरान विविध सांस्कृतिक र धार्मिक कार्यक्रमहरूको आयोजना गरिने छ।
महोत्सवको पहिलो दिन विशेष रूपमा प्रभात फेरी, शोभायात्रा, खेलकुद प्रतियोगिता, र धार्मिक अनुष्ठानसहित सांस्कृतिक कार्यक्रमहरूको प्रस्तुति हुनेछ। दोस्रो दिन मार्च पास, प्रवेशद्वार उद्घाटन, अतिथिहरूको सम्मान र लोक नृत्य प्रतियोगिता आयोजना गरिनेछ। महोत्सवको समापन तेस्रो दिन सरस्वती पूजा, प्रसाद वितरण र स्थानीय कलाकारहरूको सांस्कृतिक प्रस्तुतीसँग हुनेछ।
