काठमाडौं/विद्युत प्राधिकरणका तीन कार्यकारी प्रमुखले अपनाएका फरक–फरक नीति र तिनको प्रभावबारे एमाले महासचिव शंकर पोखरेलको एक फेसबुक पोस्ट अहिले चर्चामा छ। उनले पूर्व कार्यकारी प्रमुख मुकेशराज काफ्ले, कुलमान घिसिङ र वर्तमान कार्यकारी निर्देशक हितेन्द्रदेव शाक्यको रणनीतिक सोचको तुलना गरेका छन्।
पोखरेलका अनुसार मुकेशराज काफ्लेले विद्युत अभावका बेला लोडसेडिङको समय बढाएर उद्योगीलाई डेडिकेटेड लाइन उपलब्ध गराउने नीति लिएका थिए। यो कदमले उद्योगी वर्गलाई राहत दिएको थियो, जसका कारण उनले उद्योगीहरूको मन जिते। तर, जब कुलमान घिसिङ नेतृत्वमा आए, उनले उद्योगलाई दिइएको डेडिकेटेड लाइनको विद्युत कटौती गरेर सहर बजार उज्यालो बनाउने नीति अवलम्बन गरे। यसले सर्वसाधारण नागरिकलाई फाइदा पुग्यो, जसका कारण उनले आमजनताको मन जिते।
अहिले हितेन्द्रदेव शाक्यको नेतृत्वमा विद्युत प्राधिकरणले नयाँ नीति अपनाएको छ। उनले सहर बजारको उज्यालो कायम राख्ने मात्र नभई थप विद्युत खरिद गरेर भए पनि उद्योगलाई आवश्यक आपूर्ति पुर्याउने प्रयास गरिरहेका छन्। यसले उनले उद्योगी र सर्वसाधारण दुबैको मन जित्ने रणनीति अपनाएको देखिन्छ।
पोखरेलले आफ्नो पोस्टमा लेखेका छन्, “हरेकले आफुले गरेको कामको आफ्नै तरिकाले औचित्य देखाउने गरेकै छन्। तर मुख्य कुरा त कस्को मन जित्ने भन्ने रणनीतिक योजनाको अन्तर हो।”
उनको भनाइले विद्युत भार व्यवस्थापन नीति समयानुसार परिवर्तन हुनु आवश्यक छ भन्ने सन्देश दिन्छ। पूर्ववर्ती नेतृत्वहरूलाई परिस्थितिअनुसार देवता वा दानवको रूपमा व्याख्या गर्नु सही दृष्टिकोण होइन भन्ने उनको तर्क छ। पोखरेलको यस पोस्टले सामाजिक सञ्जालमा व्यापक प्रतिक्रिया पाइरहेको छ।
